(កំពង់ស្ពឺ)៖ លោកឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ នៅព្រឹកថ្ងៃទី១៧ ខែកុម្ភៈ ឆ្នាំ២០២៣នេះ បានរំលឹកដល់មន្ដ្រីនគរបាលទាំងអស់ ត្រូវធ្វើជាគំរូល្អដល់ប្រជាពលរដ្ឋក្នុងការគោរពច្បាប់ ពិសេសច្បាប់ស្ដីពីចរាចរណ៍ផ្លូវគោក និងគ្រឿងញៀន។
ការលើកឡើងរបស់លោកឧត្តមសេនីយ៍ឯក ឆាយ គឹមខឿន ធ្វើឡើងក្នុងឱកាសអញ្ជើញជាតំណាងនាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ ក្នុងពិធីបិទវគ្គបំប៉នជំនាញកសាងបណ្ដាញមូលដ្ឋានសម្ងាត់របស់កម្លាំងសន្ដិសុខ និងវគ្គបំប៉នជំនាញបច្ចេកទេសព្រហ្មទណ្ឌ និងបំពាក់ឋានន្ដរស័ក្ដិជូននាយនគរបាល នៅសាលានគរបាលជាតិមិត្តភាពកម្ពុជា-វៀតណាម។
ថ្លែងក្នុងឱកាសនោះ លោកឧត្តមសេនីយ៍ឯក ឆាយ គឹមខឿន បានចូលរួមអបអរសាទរ និងកោតសរសើរចំពោះសិក្ខាកាមទាំងអស់ ដែលបានបញ្ចប់ការបំប៉នជំនាញកសាងបណ្ដាញមូលដ្ឋានសម្ងាត់របស់កម្លាំងសន្ដិសុខ និងវគ្គបំប៉នជំនាញបច្ចេកទេសព្រហ្មទណ្ឌ ដែលទទួលបានលទ្ធផលយ៉ាងល្អគាប់ប្រសើរ សំដៅពង្រឹងគុណភាព និងប្រសិទ្ធភាពការអនុវត្តតួនាទីភារកិច្ចរបស់កងកម្លាំងនគរបាលជាតិ។
លោកឧត្តមសេនីយ៍ឯក ឆាយ គឹមខឿន ក៏បានកត់សម្គាល់នូវសភាពការណ៍មួយចំនួនជូនដល់សិក្ខាកាមទាំងអស់ផងដែរ ដោយបានបញ្ជាក់ថា មកទល់ម៉ោងនេះកម្ពុជា ក្រោមការដឹកនាំរបស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា រក្សាបានសន្ដិភាព ស្ថេរភាព សុវត្ថិភាពសង្គម គ្មានអំពើភេរវកម្ម។ កងកម្លាំងសមត្ថកិច្ចកម្ពុជា ក៏សម្រេចបានកិច្ចការពារកិច្ច ប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ ព្រមទាំងការបោះឆ្នោតក្រុមប្រឹក្សាឃុំសង្កាត់។
អគ្គស្នងការរងនគរបាលជាតិរូបនេះ បានបន្ដទៀតថា នៅក្នុងឆ្នាំ២០២៣នេះ កម្លាំងសមត្ថកិច្ចកម្ពុជា និយាយជារួម និងនិយាយដោយឡែក កងកម្លាំងនគរបាលជាតិ មានភារកិច្ចដ៏សំខាន់ជាច្រើនទៀត ដូចជា ការប្រកួតកីឡាស៉ីហ្គេម និងអាស៊ានប៉ារ៉ាហ្គេម និងការបោះឆ្នោតជ្រើសតាំងតំណាងរាស្ដ្រ នីតិកាលទី៧ ដែលនឹងប្រព្រឹត្តទៅនៅខែកក្កដា ឆ្នាំ២០២៣ខាងមុខ។
ឆ្លៀតក្នុងឱកាសនោះ លោកឧត្តមសេនីយ៍ឯក ឆាយ គឹមខឿន បានផ្ដាំផ្ញើដល់សិក្ខាកាមទាំងអស់ដែលបានបញ្ចប់វគ្គសិក្សានេះ ត្រូវយកចំណេះដឹងដែលទទួលបាននេះទៅបម្រើអង្គភាព ផ្សព្វផ្សាយបន្ដដល់មន្ដ្រីរួមការងារក្នុងអង្គភាព និងត្រូវខិតខំសិក្សាស្វែងយល់បន្ថែមលើជំនាញវិជ្ជាជីវៈ ពិសេសជំនាញបច្ចេកវិទ្យា ខណៈដែលបច្ចុប្បន្នសកលលោកមានការរីកចម្រើនយ៉ាងខ្លាំងខាងប្រព័ន្ធបច្ចេកវិទ្យា ដូច្នេះបទល្មើសបច្ចេកវិទ្យាក៏មានការកើនឡើង ហេតុនេះមន្ដ្រីនគរបាលទាំងអស់ត្រូវស្វែងយល់បន្ថែមទៀតដើម្បីទាន់តាមសម័យកាល។
លោកឧត្តមសេនីយ៍ឯក ឆាយ គឹមខឿន បានរំលឹកទៀតថា សិក្ខាកាមទាំងអស់នៅវិលត្រឡប់ទៅអង្គភាពវិញ ត្រូវចូលរួមអនុវត្តគោលនយោបាយភូមិ ឃុំសង្កាត់ មានសុវត្ថិភាព និងគោលនយោបាយសំខាន់ៗផ្សេងៗរបស់រាជរដ្ឋាភិបាលដែលបានដាក់ចេញ ដើម្បីពង្រឹងសុវត្ថិភាព សន្ដិសុខ សណ្ដាប់ធ្នាប់សង្គម។ លោកបញ្ជាក់ថា ការអនុវត្តគោលនយោបាយភូមិ ឃុំសង្កាត់ មានសុវត្ថិភាព មិនមែនចូលរួមតែនគរបាលនោះទេ ពោលត្រូវមានការចូលរួមពីអាជ្ញាធរមានសមត្ថកិច្ច ស្ថាប័នពាក់ព័ន្ធ និងប្រជាពលរដ្ឋផងដែរ។ លោកអះអាងថា ការអនុវត្តគោលនយោបាយភូមិ ឃុំសង្កាត់ មានសុវត្ថិភាព បានល្អប្រសើរ នាំឲ្យមូលដ្ឋានរបស់យើងគ្មានបទល្មើស គ្មានអំពើលួច ឆក់ ប្លន់ជាដើម។
បន្ថែមពីនេះ លោកឧត្តមសេនីយ៍ឯក ឆាយ គឹមខឿន ណែនាំសិក្ខាកាមទាំងអស់ត្រូវគោរពបទបញ្ជា គោរវិន័យរបស់កងកម្លាំង ហើយត្រូវបំពេញភារកិច្ចប្រកបដោយក្រមសីលធម៌ វិជ្ជាជីវៈ ម៉ឺងម៉ាត់ តែទន់ភ្លន់។ លើសពីនេះ ត្រូវមានការសាមគ្គីភាពផ្ទៃក្នុង, មានស្មារតីទទួលខុសត្រូវខ្ពស់ កុំមានជំងឺតួឯក ត្រូវតែមានការសហការធ្វើការជាក្រុម ដើម្បីឲ្យកិច្ចប្រតិបត្តិការទទួលបានជោគជ័យ។ លោកឧត្តមសេនីយ៍ឯក អគ្គស្នងការរង ក៏មិនភ្លេចរំលឹកឲ្យមន្ដ្រីនគរបាលទាំងអស់ ត្រូវបន្ដចូលរួមទប់ស្កាត់ បទល្មើសគ្រឿងញៀន ដោយអនុវត្ដ «៣កុំ ១រាយការណ៍» និងអប់រំ ផ្សព្វផ្សាយដល់ក្រុមគ្រួសារ បងប្អូន ញាតិមិត្ត អំពីគ្រោះថ្នាក់ និងផលប៉ះពាល់ធ្ងន់ធ្ងរនៃគ្រឿងញៀន ហើយត្រូវធ្វើជាគំរូល្អក្នុងការគោរពច្បាប់ចរាចរណ៍ផ្លូវគោកជាដើម។
ជាមួយគ្នានេះ លោកឧត្តមសេនីយ៍ឯក ឆាយ គឹមខឿន បានថ្លែងអំណរគុណដល់ថ្នាក់ដឹកនាំសាលានគរបាលជាតិមិត្តភាពកម្ពុជា-វៀតណាម ដែលបានខិតខំប្រឹងប្រែងនាពេលកន្លងមក ដោយទទួលបានលទ្ធផលយ៉ាងល្អប្រសើរ ហើយលោកបានណែនាំឲ្យខិតខំប្រឹងប្រែងបន្ដទៀត លើការបណ្ដុះបណ្ដាលធនធាននគរបាលប្រកបដោយសក្ដានុពល សំដៅអនុវត្តការងារប្រកបដោយប្រសិទ្ធភាពខ្ពស់។
យោងតាមរបាយការណ៍របស់ លោកឧត្តមសេនីយ៍ឯក អ៊ុ អុន អនុប្រធានសេនាធិការ និងជានាយកសាលានគរបាលជាតិមិត្ដភាពកម្ពុជា-វៀតណាម មានគោលការណ៍អនុញ្ញាតពីអគ្គស្នងការនគរបាលជាតិ សាលានគរបាលជាតិមិត្តភាពកម្ពុជា-វៀតណាម បានធ្វើពិធីបើកវគ្គបំប៉នជំនាញកសាងបណ្តាញមូលដ្ឋានសម្ងាត់របស់កម្លាំងសន្តិសុខ និងវគ្គបំប៉នជំនាញបច្ចេកទេសព្រហ្មទណ្ឌ ជូនមន្ត្រីនគរបាលជាតិសរុបចំនួន២៣០នាក់ សិក្សារយៈពេល០៣ខែ ចាប់ពីថ្ងៃទី១៤ ខែវិច្ឆិកា ឆ្នាំ២០២២ ដល់ថ្ងៃទី១៧ ខែកុម្ភៈ ឆ្នាំ២០២៣ ត្រូវបានបញ្ចប់ដោយជោគជ័យ នាថ្ងៃនេះ៕
